�� JANAR 2010

1/1 E premte SH. MARIA VIRGJËR NËNA E HYJIT [P]
Dita Botërore e Paqes
Nr 6,22-27; Ps 66; Gal 4,4-7; Lk 2,16-21
Të ndriçoftë Zoti me fytyrën e vet Nr 6,25
Në mendimet e Hyjit njeriu zë vendin e parë, për këtë e ka rrethuar me bekimet e tij. Drita e fytyrës së tij, që shkëlqen mbi ne, është gjëja më e çmuar që mund të na dhurojë, dhe këtë na e përsërit që nga faqet e para të Biblës tek ato të fundit. Dhe që ne të mos mendojmë se këto janë vetëm fjalë, na ka dhënë Marinë e Shenjtë, që Jezusi, drita që ndriçon çdo njeri, të vijë të jetojë mes nesh.

2/1 E shtunë K.KR. [P]
Sh. Bazili i madh (� 379) dhe Sh. Gregori nga Nazianzi (� 390), ipeshkvinj dhe mësues
1Gjn 2,22-28; Ps 97; Gjn 1,19-28
Në mesin tuaj është një që ju nuk e njihni Gjn 1,26
Të njohim Jezusin është dhurata më e madhe që mund të marrim prej Hyjit. E kanë njohur atë Gjon Pagëzori, që është quajtur "miku i dhëndrit"; e kanë njohur shën Bazili i Madh dhe Gregori i Nazianzit të cilët, të dashuruar pas tij, kanë gëzuar praninë e tij dhe me jetën e tyre na kanë ndihmuar edhe ne që ta njohim më mirë.

3/1 E diela II pas Krishtlindjes [P]
Emri Tejet i Shenjtë i Jezusit
Sir 24,1-4.8-12; Ps 147; Ef 1,3-6.15-18; Gjn 1,1-18
Drita shndriti në errësirë Gjn 1,5
Shën Gjoni do të na e paraqesë Jezusin si Bir të Hyjit, e si Hyj që prej amshimit. Ai është e vetmja dritë e vërtetë që ndriçon terrin e padijes sonë për Hyjin dhe "ylli polar" në errësirën e pashmangshme të kërkimit tonë.
Faleminderit Jezus, që mund të shqiptojmë Emrin tënd, në të cilin kemi gjetur shpresë dhe arsye për një jetë të re, jetë "qiellore"!

4/1 E hënë K.KR. [P]
Shën Anxhela nga Foligno
1Gjn 3,7-10; Ps 97; Gjn 1,35-42
Çka kërkoni? Gjn 1,38
Dy burra po ndjekin Jezusin, të shtyrë nga Gjon Pagëzori. Jezusi i sheh e u thotë: "Çfarë kërkoni?". Si për t'u thënë, kërkoni diçka për vete apo më kërkoni mua për të më ndjekur? Është e lehtë ta kërkojmë për interesin tonë e jo për t'iu dhuruar atij!

5/1 E martë K.KR. [P]
Shën Emiliana
1Gjn 3,11-21; Ps 99; Gjn 1,43-51
Eja e shih Gjn 1,46
Takimi me Jezusin, që çdo zemër e pret në mënyrë të vetëdijshme apo të pavetëdijshme, na shtyn që ta shpallim Atë. Por, si do jetë e besueshme kjo shpallje?
Do të jetë e tillë nëse ai do të jetë i gjallë brenda nesh e në mes nesh, nëse në të ne do të bëhemi një zemër e vetme! Eja, Shpirt Shenjt!

6/1 E mërkurë DËFTIMI I ZOTIT [P]
Is 60,1-6; Ps 71; Ef 3,2-3a.5-6; Mt 2,1-12
Pamë yllin e tij duke lindur Mt 2,2
Sa bukur, Jezus, kur edhe ne, si Dijetarët, dimë të shquajmë shenjat e pranisë sate! Dimë ku të shkojmë, mësojmë të dëgjojmë, e duke u bërë kaq të vëmendshëm, dallojmë mashtrimin e armikut kudo që të fshihet.
Kur të gjejmë ty, e gjithë jeta jonë ndryshon. Të orientuar kah ti, vetë ne bëhemi shenjë e pranisë sate të dashurisë mes njerëzve dhe, si ylli, i drejtojmë tek ti!

7/1 E enjte K.KR. [P]
Sh. Rajmondi nga Penjafort, meshtar (� 1275)
1Gjn 3,22 - 4,6; Ps 2; Mt 4,12-17.23-25
Mbretëria e Hyjit është ngjat Mt 4,17
Jezusi vazhdon t'u kujtojë njerëzve se Dashuria e Hyjit është afër, ajo shpëton e shëron shpirtin dhe trupin e dhuron jetën e amshuar nëpërmjet kthimit në besim.
Eja, Shpirt Shenjt, bëje zemrën time si zemrën e Birit, të aftë për të njohur dashurinë e Atit!

8/1 E premte K.KR. [P]
Sh. Severini
1Gjn 4,7-10; Ps 71; Mk 6,34-44
Ta duam njëri-tjetrin 1Gjn 4,7
Kjo thirrje mund t'i drejtohet nga çdo bari i Kishës së shenjtë besimtarëve të tij, nga çdo nënë apo baba familjarëve të tij, nga çdo mësues nxënësve të tij, nga çdo përgjegjës bashkësie "vëllezërve" apo "motrave" të tij�
Kështu do t'i shpallet botës pak nga thelbi i Hyjit, që është Dashuri. Eja, Shpirt Shenjt!

9/1 E shtunë K.KR. [P]
Sh. Adriani
1Gjn 4,11-18; Ps 71; Mk 6,45-52
Hyji është dashuri 1Gjn 4,16
Sa shumë thirrje për ndihmë ngrihen nga njeriu, sa shumë përse ka mbi buzët e tij e sa shumë pasiguri në zemrën e tij! Hyji nuk jep përgjigje, nuk do të justifikojë ato që ndodhin e as të pakësojë dhimbjen tonë. Hyji "bëhet Përgjigje". Në këtë vuajtje të madhe Hyji ofrohet si e vetmja dritë e mbështetje. Dashuria është gjithçka kemi nevojë për të jetuar. Faleminderit, o Atë i mirë!

10/1 E diel PAGËZIMI I ZOTIT Viti C [P]
Sh. Agatoni (Mirashi)
Is 40,1-5.9-11; Ps 103; Tit 2,11-14;3,4-7; Lk 3,15-16.21-22
U pagëzua edhe Jezusi dhe, ndërsa po lutej, u hap qielli Lk 3,21
Gjatë këtij viti liturgjik lexojmë Ungjillin e Sh. Lukës. Ky Ungjilltar, në rrëfimin e pagëzimit të Zotit, nënvizon një hollësi: Jezusi, pasi ka dalë nga Jordani, është duke u lutur kur Shpirti Shenjt zbret mbi të dhe Ati e quan "Biri im".
Vërtet, lutja është burim i Shpirtit Shenjt dhe na çon të njohim Atin!

11/1 E hënë I K.GJ.V. [I]
Sh. Pavlini
1Sam 1,1-8; Ps 115; Mk 1,14-20
Ejani pas meje Mk 1,17
Jezus, si duhet dhe ku të të ndjek �?
Ti do që ne të të ndjekim me dashuri si Bir i Atit që je! Ti do që ta jetojmë me gjithë zemër thirrjen tonë ndërsa përshkojmë rrugën tënde, rrugë që nëpërmjet vuajtjes së përditshme na udhëheq sërish drejt gjirit të Atit.

12/1 E martë I K.GJ.V. [I]
Sh. Tatiana
1Sam 1,9-20; 1Sam 2,1.4-8; Mk 1,21-28
Unë e di kush je Mk 1,24
Nuk mjafton ta dimë me mendje se kush është Jezusi në mënyrë që t'i pëlqejmë atij; na duhet t'i japim besim, ta duam porsi shenjtërit. Në këtë mënyrë ne do të jemi një ndihmë e vlefshme për ata që kemi pranë dhe për çdo njeri që takojmë.

13/1 E mërkurë I K.GJ.V. [I]
Sh. Hilari, ipeshkëv dhe mësues (�367)
1Sam 3,1-10.19-20; Ps 39; Mk 1,29-39
Urdhëro, sepse më ke thirrur! 1Sam 3,8
Edhe unë kam patur hirin të dëgjoj zërin e Hyjit e ftesën e tij për ta ndjekur. Nuk që kaq e lehtë sa për Samuelin. U deshën vite që unë ta shquaja atë zë, që mes të tjerësh, kumbonte në zemrën time. Edhe unë e pata të nevojshme ndihmën e dikujt që jetonte tashmë me Hyjin dhe e njihte zërin e tij. Faleminderit, Jezus, për thirrjen e atëhershme. Faleminderit edhe për ato që më bën të dëgjoj çdo ditë e të cilave më ndihmon ende që t'u përgjigjem me gëzim: "Ja ku jam!".

14/1 E enjte I K.GJ.V. [I]
Sh. Feliksi
1Sam 4,1-11; Ps 43; Mk 1,40-45
Merrni zemër e bëhuni trima 1Sam 4,9
Me këto fjalë filistenjtë nxisnin njëri-tjetrin për të luftuar kundër Izraelit. Zemra e izraelitëve ishte larguar nga Hyji dhe ata, duke mbetur pa rojtarin dhe mbrojtësin e tyre, u mundën. Prania e Arkës së Besëlidhjes nuk shërbeu për asgjë. O Atë i mirë e i shenjtë, tërhiqe tek ti zemrën tonë që të mund të fitojmë mbi të gjithë armiqtë tanë!

15/1 E premte I K.GJ.V. [I]
Shën Pali heremit
1Sam 8,4-7.10-22; Ps 88; Mk 2,1-12
Biro, të janë falur mëkatet Mk 2,5
Një i paralizuar i paraqitet Jezusit me besimin e sigurt se ai do mund ta ndihmojë. Jezusi i dhuron së pari dashurinë e tij atërore me shërimin e brendshëm, domethënë me faljen e fajeve të tij; pastaj do t'i dhurojë edhe shërimin e trupit.
Faleminderit, Zot Jezus!

16/1 E shtunë I K.GJ.V. [I]
Shën Donati, martir
1Sam 9,1-4.10.17-19; 10,1a; Ps 20; Mk 2,13-17
Jezusi përsëri doli në breg të detit Mk 2,13
Sot, Jezus, dua të "dal" me ty: do të të mbaj në zemër e do ta lë veten të mbartem prej teje. Vendin e lodhjes sime ti e njeh dhe e bekon. Më bëj mjet të dashurisë sate për të gjithë ata që sot, në provaninë tënde, do t'i vësh në rrugën time.

17/1 E diel II K.GJ.V. Viti C [II]
Sh. Antoni, abat (� 356)
Is 62,1-5; Ps 95; 1Kor 12,4-11; Gjn 2,1-12
Nxënësit e tij besuan në të Gjn 2,11
Dishepujt e ftuar me Jezusin në dasmën e Kanës u çuditën nga fakti që vera e mirë u shërbye në fund. Ata e kishin kuptuar se Jezusi kishte ndërhyrë duke shndërruar në verë ujin e qypave të ritit të pastrimit. Nga kjo "shenjë" ata kuptuan se Jezusi kishte autoritetin tipik të profetëve, dhe shumë më tepër.
Që prej atij çasti, duke iu bindur udhëzimit të Marisë, gjithashtu e pranishme në festë, do të bëjnë "gjithçka që ai do t'ju thotë".

18/1 E hënë II K.GJ.V. [II]
Shën Priska
Tetëditëshi i lutjes për bashkimin e të krishterëve
1Sam 15,16-23; Ps 49; Mk 2,18-22
Askush nuk e qet verën e re në rrëshiqa të vjetër Mk 2,22
Nëse dua të rri pranë Jezusit për ta ndjekur, është e nevojshme që ta njoh si të vetmin Mësues, si Zotërinë që më njeh më shumë nga ç'e njoh unë veten time, e që më do; atëherë do të jem gati për të pranuar Shpirtin Shenjt që ai dhuron dhe gati për të qëndruar i bashkuar me ata që besojnë tek ai.

19/1 E martë II K.GJ.V. [II]
Shën Mario
Tetëditëshi i lutjes për bashkimin e të krishterëve
1Sam 16,1-13; Ps 88; Mk 2,23-28
Zoti vëren zemrën 1Sam 16,7
Zoti iu jep hir të përvuajturve: "Ai pa përvujtërinë e shërbëtores së vet". Ai zgjedh si bashkëpunëtorë të Mbretërisë së vet persona me zemër të gatshme për të dashur, të gatshëm për të shërbyer si ai, të gatshëm për të qenë një gjë e vetme me të gjithë të thirrurit.
O Shpirt Shenjt, udhëhiqi e mbështeti të gjithë të krishterët!

20/1 E mërkurë II K.GJ.V. [II]
Sh. Fabiani, papë dhe martir (� 250); Sh. Sebastiani, martir (� shek. III)
Tetëditëshi i lutjes për bashkimin e të krishterëve
1Sam 17,32-33.37.40-51; Ps 143; Mk 3,1-6
Jezusi i tha njeriut: "Çohu e dil para të gjithëve!" Mk 3,3
Për atë njeri duhet të ketë qenë e zorshme të vihej në qendër të vëmendjes, duke qenë sakat...! Afërmendsh në ftesën e Jezusit ai ka dalluar një tingull të zërit ndryshe nga zakonisht, tingullin e atij që e vlerëson ashtu siç është. Për personat që janë të gatshëm të "poshtërohen" për t'iu bindur fjalës së tij, Jezusi mund të bëjë mrekulli... Le t'i kërkojmë Zotit që t'u japë kishave të ndryshme të krishtera hirin që të pranojnë me përvujtëri lidhjen me traditat dhe mendësitë përkatëse, që të mos i quajnë më të rëndësishme nga vullneti i Jezusit.

21/1 E enjte II K.GJ.V. [II]
Shën Anjeza, virgjër dhe martire (� 304)
Tetëditëshi i lutjes për bashkimin e të krishterëve
1Sam 18,6-9;19,1-7; Ps 55; Mk 3,7-12
Unë do të flas me tim atë për punë tënde 1Sam 19,3
Sauli kishte vendosur ta vriste Davidin. Jonatani, meqë e donte Davidin si veten e tij, i foli në favor të tij të atit, Saulit. Mundi në këtë mënyrë ta fuste në shpurën e tij si më parë. Ne kemi një Atë të mrekullueshëm, më të mirë se Sauli. Le t'i flasim me besim dhe mirëbesim për unitetin e të krishterëve: Ai do të na e përmbushë lutjen.

22/1 E premte II K.GJ.V. [II]
Sh. Vinçenci, diakon dhe martir (� shek. III)
Tetëditëshi i lutjes për bashkimin e të krishterëve
1Sam 24,3-21; Ps 56; Mk 3,13-19
Jezusi u ngjit në një mal e i thirri ata që deshi vetë Mk 3,13
Mund të jem i qetë në besimin tim, Jezus, kur ti më thërret pranë teje e më beson ndonjë detyrë: në çdo vendim tëndin, në fakt, ti je plotësisht i bashkuar me Atin, vullneti yt është i tiji, dashuria jote është dashuria e tij. Sa i bukur është Shpirti i unitetit që ju bashkon, Atë e Bir: le të mbretërojë ky shpirt edhe tek të gjithë ne besimtarët!

23/1 E shtunë II K.GJ.V. [II]
Shën Emerenciana
Tetëditëshi i lutjes për bashkimin e të krishterëve
2Sam 1,1-4.11-12.17.19.23-27; Ps 79; Mk 3,20-21
U kthye në një shtëpi e prapë u mblodh një turmë e madhe Mk 3,20
Jezusi, njeri i përkryer, është Hyj, plot me urti e dashuri; çdo njeri ka nevojë për këto dhurata.
Edhe sot ai është i gjallë e i pranishëm në botë! Nesër është e diel: do të mblidhemi me të për të pranuar dhuratën e tij, për t'i thënë nga ana jonë faleminderit!

24/1 E diel III K.GJ.V. Viti C [III]
Sh. Françesku i Salesit, ipeshkëv dhe mësues (� 1622)
Tetëditëshi i lutjes për bashkimin e të krishterëve
Neh 8,2-4.5-6.8-10; Ps 18; 1Kor 12,12-31; Lk 1,1-4; 4,14-21
Të gjithë në sinagogë i drejtuan sytë në të Lk 4,20
Banorëve të Nazaretit u kish bërë përshtypje mënyra se si Jezusi kishte kremtuar liturgjinë e tyre, shprehja me të cilën kishte lexuar Shkrimet dhe drita e fytyrës së tij pas dyzet ditësh në shkretëtirë!
Faleminderit, Jezus, për bukurinë tënde që na tërheq tek ti. Faleminderit që i lejon Kishës sate ta ngulë shikimin mbi ty, për të kapërcyer çka na ndan e për t'u angazhuar seriozisht në shpalljen e Ungjillit.

25/1 E hënë Kthimi i Shën Palit [P]
Tetëditëshi i lutjes për bashkimin e të krishterëve
Vap 22,3-16 (ose Vap 9,1-22); Ps 117; Mk 16,15-18
Në emër tim do t'i dëbojnë djajtë Mk 16,17
"Djalli ju urren" ka thënë një ekzorcist i njohur. Prandaj dhe Jezusi i ka dhënë Kishës së vet "autoritetin" që ta çlirojë njeriun nga armiku i vet, që do ta pengojë t'i afrohet fjalës së tij e të përjetojë plotësinë e dashurisë së tij.
Le t'i kërkojmë Zotit që të mbështesë vëllezërit e zgjedhur për këtë shërbim e të dëgjojë lutjen e tyre. "Na liro nga i keqi", na shkul nga ngërthimi i tij, Jezus; shndërroje zemrën tonë me dritën e pranisë sate në mënyrë që, si Shën Pali, të mund të bëhemi mjet bashkimi në Kishën tënde.

26/1 E martë III K.GJ.V. [III]
Sh. Timoteu dhe Titi, ipeshkvinj (� shek. I)
2Sam 6,12-15;17-19; Ps 23; Mk 3,31-35
Davidi vallëzonte gjithsa ku e kishte para Zotit 2Sam 6,14
O Shpirt Shenjt, na e hap zemrën që të dimë ta njohim Jezusin e pranishëm mes nesh të krishterëve kur ti na mbledh në emrin e tij, e të mund ta dëshmojmë me besim dhe me gëzim!

27/1 E mërkurë III K.GJ.V. [III]
Sh. Anxhela Meriçi virgjër (� 1540)
2Sam 7,4-17; Ps 88; Mk 4,1-20
Ai mësonte në shëmbëlltyra e u thoshte: "Dëgjoni!" Mk 4,2-3
Jezusi, duke rrëfyer shëmbëlltyrat, ka mundësinë që të kuptohet nga të gjithë. Nga rrëfimet e këtyre fakteve të jetës së zakonshme, të vegjël e të mëdhenj mund të marrin diçka prej mësimit të tij. Nëse "e mbajmë lart fjalën e Hyjit" do të japim fryte! Prandaj dhe ne marrim pjesë në nismat për dëgjimin e Fjalës së Hyjit dhe bashkëpunojmë me ata që vënë në jetë këtë shërbim të çmuar.

28/1 E enjte III K.GJ.V. [III]
Sh. Toma i Akuinit, meshtar dhe mësues (� 1274)
2Sam 7,18-19.24-29; Ps 131; Mk 4,21-25
Atij që ka, do t'i jepet më Mk 4,25
Kush ushtron besimin tek Jezusi duke jetuar fjalën e tij, do të marrë gjithmonë e më shumë jetë, besim të ri e aftësi për të dashur; zemra e tij do të zgjerohet porsi ajo e shenjtërve.
Shpirt Shenjt, unë besoj tek ndihma jote!

29/1 E premte III K.GJ.V. [III]
Sh. Valeri
2Sam 11,1-4.5-10.13-17; Ps 50; Mk 4,26-34
Mbretëria e Hyjit i përngjet kokrrës së sinapit Mk 4,30-31
Fara e Mbretërisë së Hyjit, e vendosur në zemrat e të gjithë atyre që kanë marrë dhuratën e pagëzimit të shenjtë, nëse ruhet me dashuri, zhvillohet në mënyrë të mrekullueshme: le të sjellim ndër mend jetën e të gjithë shenjtërve!
Çdo i krishterë mundet të mbërrijë tek një jetë e tillë!

30/1 E shtunë III K.GJ.V. [III]
Sh. Martina
2Sam 12,1-7.10-17; Ps 50; Mk 4,35-41
Jezusi në pope flinte në nënkresë Mk 4,38
Jezusi po flinte në varkë, i lodhur nga predikimi i ditëve të mëparshme. Por, sapo e thërrasin dishepujt, ai zgjohet, i urdhëron erës të fashitet e dallgëve të qetësohen. Ai është Zotëria i qiellit dhe i tokës dhe i çdo gjendjeje frike që ne kemi. Do të ushtrohemi ta "thërrasim", të jetojmë në bashkim me të , e ai do të na dhurojë paqen e tij, gjithmonë.

31/1 E diel IV K.GJ.V. Viti C [IV]
Sh. Gjon Bosko, meshtar (� 1888)
Jer 1,4-5.17-19; Ps 70; 1Kor 12,31 - 13,13; Lk 4,21-30
Të gjithë e miratonin Lk 4,22
Për një çast banorët e Nazaretit u mrekulluan nga fjala e Jezusit. Por si shumë të tjerë, në vend që të përpiqeshin ta njihnin më thellë, nuk i besuan. Duke ndjekur arsyetimet e tyre njerëzore e përzunë. Zot Jezus, na bëj të përvujtur e të varfër përballë pranisë së mistershme të Hyjit në ty! Vetëm ti mund të na bëhesh i njohur për të na shpëtuar!