1/7 E enjte XIII K.GJ.V. [I]
Sh. Estera
Am 7,10-17; Ps 18; Mt 9,1-8
Kur pa turma, e kapi frika e i dha lavd Hyjit Mt 9,8
Frika e Hyjit është ajo prirje e brendshme që na habit me ndërhyrjen e Hyjit në ne apo përreth nesh dhe si pasojë na pohon se duhet të besojmë gjithnjë e më tepër fjalën e tij.
Edhe ne çuditemi me dhuratën që Hyji i ka bërë njerëzve, që të falin mëkatet në emrin e tij.

2/7 E premte XIII K.GJ.V. [I]
Sh. Bernardini
Am 8,4-6.9-12; Ps 118; Mt 9,9-13
I tha: "Eja mbas meje!" Mt 9,9
Duke i thënë kështu Mateut të ulur në tryezën e tatimeve, Jezusi i drejtoi ftesën që ta linte veten të udhëhiqej në kërkimin e jetës së plotë që kurrë nuk do t'i hiqej. Duke hyrë në një marrëdhënie bindjeje dhe dashurie me Jezusin, do të shohim se ai nuk na heq gjë tjetër veçse atë çka na pengon ta gëzojmë realisht.

3/7 E shtunë Sh. TOMA, Apostull [P]
Ef 2,19-22; Sal 116; Gjn 20,24-29
Mos ji njeri që s'beson, por besimtar! Gjn 20,27
Janë fjalët që Jezusi i ringjallur i ka thënë Tomës që nuk i kishte besuar apostujt e tjerë që e kishin parë të ngjallur nga të vdekurit. E njëjta dëshmi na drejtohet neve nga ana e të gjithë shenjtërve që, duke besuar, kanë jetuar një përvojë të madhe të Jezusit të gjallë e të ringjallur. Madje edhe në mes nesh mund të ndeshim njerëz që mund të na tregojnë me thjeshtësi takimin e tyre me Atë që e jep jetën me bollëk!

4/7 E diel XIV K.GJ.V. Viti C [II]
Sh. Elizabeta e Portugalisë (†1336)
Is 66,10-14; Ps 65; Gal 6,14-18; Lk 10,1-12.17-20
Asgjë s'do të mund t'ju bëjë keq Lk 10,19
Këto fjalë iu drejtuan nga Jezusi shtatëdhjetë e dy dishepujve të kthyer nga misioni i tyre i shpalljes së Mbretërisë tek njerëzit. Kur bëjmë diçka duke iu bindur Jezusit nuk duhet të kemi frikë: ai nuk na lejon të bëjmë asgjë që mund të lëndojë jetën tonë!

5/7 E hënë XIV K.GJ.V. [II]
Sh. Anton Maria Zakaria, meshtar (t1539)
Oz 2,16-18.21-22; Ps 144; Mt 9,18-26
Do të të bëj fatin tim të përhershëm Oz 2,21
Hyji i flet popullit të vet Izraelit, dhe tani ne të krishterëve, popullit të tij të ri. Ai është dhëndri dhe ne, si bashkë si Kishë ashtu edhe individualisht jemi "nusja" e tij: sa gjë e madhe është dashuria e tij besnike! Ai na e jep nëpërmjet Jezusit!

6/7 E martë XIV K.GJ.V. [II]
Sh. Maria Goreti, virgjër dhe martire (†1902)
Oz 8,4-7.11-13; Ps 113B; Mt 9,32-38
Jezusi qarkullonte nëpër fshatra, mësonte në sinagogat e tyre Mt 9,35
Jezusi për më tepër ka dëshirë të mësojë në sinagoga, vende ku mblidhet populli. Aty ai shpjegon Shkrimet duke vënë në dukje se ato po realizohen tek ai. Mësimi i tij vjen edhe tek ne dhe jep ende fryte; aty ku pranohet shoqëria bëhet mbretëria e Hyjit, vend vëllazërimi dhe paqeje!

7/7 E mërkurë XIV K.GJ.V. [II]
Sh. Asti, ipeshkëv dhe martir († rreth 100)
Oz 10,1-3.7-8.12; Ps 104; Mt 10,1-7
Është koha Zotin të kërkoni Oz 10,12
Shpesh themi duke parë rreth e rrotull: çfarë po ndodh? Po shumohen idhujtaritë, si në kohën e profetit Ozea. Për këtë edhe ne jemi të ftuar ta kërkojmë Zotin me më shumë angazhim. Nuk mund të jetojmë më duke vjelë nga besimi i gjyshërve tanë, por duhet të jemi të pasur me vendime të përditshme besimi për të pranuar dhuratën e Hyjit.

8/7 E enjte XIV K.GJ.V. [II]
Sh. Adriani
Oz 11,1.3-4.8-9; Ps 79; Mt 10,7-15
Gjatë udhëtimit predikoni: 'Mbretëria e qiellit është ngjat' Mt 10,7
Jezusi i dërgon apostujt e tij në të gjithë botën për të shpallur me fjalë e vepra lajmin e mirë që mbretëria e Hyjit ka filluar: u ofrohet të gjithëve me anë të besimit në Zotin Jezu Krisht, shpëtimtari i vetëm dhe burimi i jetës së vërtetë dhe të shenjtë.

9/7 E premte XIV K.GJ.V. [II]
Sh. Augustin Zhao Rong, meshtar (t 1815) dhe shokët, martirë
Oz 14,2-10; Ps 50; Mt 10,16-23
Do t'i dua me bujari Oz 14,5
Faleminderit, o Atë i mirë, për besnikërinë tënde në dashuri megjithë pabesitë tona; faleminderit që na jep dashurinë tënde nëpërmjet Jezusit dhe Shpirtit Shenjt, në Kishën tënde: faleminderit për jetën e shenjtërve të tu!

10/7 E shtunë XIV K.GJ.V. [II]
Sh. Amalia (Alma)
Is 6,1-8; Ps 92; Mt 10,24-33
Të gjitha fijet e flokëve të kresë suaj janë të njehura Mt 10,30
Jezusi na do të fortë në besimin tek Hyji që të mund të jetojmë sipas fjalës së tij, edhe kur të jemi të kundërshtuar apo të përndjekur. Jemi të çmuar për Atin si bij të dashur; ai nuk do të lejojë të na ndodhë asgjë përveç asaj çka është e mirë për përfitimin tonë shpirtëror.

11/7 E diel XV K.GJ.V. Viti C [III]
Sh. BENEDIKTI, Pajtor i Evropës († 547)
Lp 30,10-14; Ps 18; Kol 1,15-20; Lk 10,25-37
E pa dhe pati dhimbë për të Lk 10,33
Jezusi i del krah skribit që si ka "rënë" në krenarinë e tij, nuk arrin më të kuptojë Fjalën e Hyjit dhe ta jetojë. Edhe neve mund të na ndodhë të takojmë vëllezër që, të mposhtur nga mendimet e botës, nuk arrijnë të dëgjojnë zërin e Atit. Jezusi na kërkon t'u qëndrojmë pranë, t'i ndihmojmë të dëgjojnë që të mund të hyjnë në Jetë.

12/7 E hënë XV K.GJ.V. [III]
Sh. Fortunati
Is 1,10-17; Ps 49; Mt 10,34-11,1
Kush nuk e merr kryqin e vet nuk është i denjë për mua! Mt 10,38

…të marrim kryqin…:
të zbrazemi krejtësisht nga sa nuk është e përjetshme, për të marrë të Përjetshmin.
Jezus, jam i denjë për ty kur mbaj kryqin! Atë, burim i Dashurisë, më jep dashuri për të vuajtur me Jezusin! Shpirt Shenjt, më ndriço e më përforco!

13/7 E martë XV K.GJ.V. [III]
Sh. Enriku († 1024)
Is 7,1-9; Ps 47; Mt 11,20-24
Ki kujdes, mos u shqetëso, mos druaj Is 7,4
Këto fjalë i thuhen nga profeti Isai Akazit, mbretit të Izraelit që ishte trazuar si degët në një pyll përballë pranisë kërcënuese të trupave të aramenjve. Është e rëndësishme që t'i kushtojmë vëmendje atij që na flet në emër të Hyjit. Është e rëndësishme të dimë të dallojmë se nga kush dhe nga cilat mendime ne i vëmë në lëvizje ndjenjat tona dhe gjithë jetën tonë, në mënyrë që të varemi gjithnjë dhe vetëm nga Hyji i paqes.

14/7 E mërkurë XV K.GJ.V. [III]
Sh. Kamili nga Lellis, meshtar (†1614)
Is 10,5-7.13-16; Ps 93; Mt 11,25-27
Mirë, o Atë, pse të pëlqeu ty kështu Mt 11,26

Hyji, që është Atë i mirë de i drejtë, përgatit çdo gjë në të mirë të të gjithëve. Ai e lë veten ta njohin të përvujturit që i prin në udhët e tij të paqes me anë të besimit në birin e tij Jezus. Mendjemëdhenjve dhe atyre që u mjafton vetja ai nuk mund t'u dhurohet, sepse ata janë plot me veten e tyre; pret kthimin e tyre.

15/7 E enjte XV K.GJ.V. [III]
Sh. Bonaventura, ipeshkëv dhe mësues († 1274)
Is 26,7-9.12.16-19; Ps 101; Mt 11,28-30
Unë do t'ju çlodh Mt 11,28
Faleminderit Jezus, që i fton tek ti ata që janë të lodhur dhe të shtypur; ti na njeh të gjithëve thellë, ti na do, na ofron fjalën tënde të shenjtë, na çliron nga çdo e keqe, na udhëheq në udhët e tua të paqes. Ja, unë po vij, o Zot, për të kryer vullnetin tënd.

16/7 E premte XV K.GJ.V. [III]
Sh. Maria Virgjër e Malit Karmel
Is 38,1-6.21-22.7-8; Is 38,10.11.12.16; Mt 12,1-8
Dua mëshirën e jo flinë Mt 12,7
Mendimet dhe fjalët e gjykimit dhe dënimit për vëllezërit tanë janë gati gjithnjë fryt i një 'pranie' jo të mirë në ne. Ndjenjat e zemërdhembshurisë, të faljes, të durimit vijnë përkundrazi nga prania e Hyjit në ne. Le t'i përqasemi sakramentit të zemërdhembshurisë për të fituar dhe pranuar zemërdhembshurinë.

17/7 E shtunë XV K.GJ.V. [III]
Sh. Aleksi (Lleshi)
Mik 2,1-5; Ps 9B; Mt 12,14-21
Vaj për ata që sendërgjojnë mbrapshtinë Mik 2,1
Njerëzit për të cilët flet profeti janë viktima të djallit, që do të shkatërrojë jetën e tyre dhe, si pasojë, edhe atë të të tjerëve. Jezusi ka ardhur për të na çliruar nga një armik i tillë i njeriut; në të jemi edhe të mbrojtur nga çdo tundim dhe të mbushur me dashuri për vëllezërit në besim dhe për të gjithë. Faleminderit, Jezus, drita ime dhe shpëtimi im.

18/7 E diel XVI K.GJ.V. Viti C [IV]
Sh. Frederiku
Zan 18,1-10; Ps 14; Kol 1,24-28; Lk 10,38-42
E nevojshme është vetëm një gjë Lk 10,42
A e di, Jezus, është vërtet siç thua ti: kur dëgjoj televizionin dhe gazetat, apo ndjek gjykimin e botës, zemra ime trazohet, shqetësohet, bëhet pre e njëmijë mendimeve dhe nuk gjen paqe dhe kërkon, kërkon vazhdimisht, njësoj si Marta. Kur të dëgjoj ty, atëherë qetësohem dhe jam gati për çdo gjë, gati për të dëgjuar çdo vëlla dhe për t'i shërbyer.

19/7 E hënë XVI K.GJ.V. [IV]
Sh. Rufina
Mik 6,1-4.6-8; Ps 49; Mt 12,38-42
T'është dëftuar ç'është e mirë, o njeri Mik 6,8
Profeti Mikea përmbledh edhe për ne atë çka është thelbësore në jetë: të bëjmë atë çka do Zoti, ta dëgjojmë gjithmonë, të jemi të përvujtur.
Jezusi është drita jonë dhe na jep fuqinë për të jetuar në këtë mënyrë. Faleminderit Jezus, tek ti besoj!

20/7 E martë XVI K.GJ.V. [IV]
Sh. Apolinari, ipeshkëv dhe martir († shek. II)
Mik 7,14-15.18-20; Ps 84; Mt 12,46-50
Ja nëna ime e vëllezërit e mi Mt 12,49
Jezusi ka afërsinë e dishepujve që e dëgjojnë. Në ta Fjala e Hyjit bëhet mish, pra i ngjasojnë, janë porsi ai, janë kushërinjtë e tij të ngushtë!
Edhe unë i ndiej pranë ata që ruajnë Fjalën e Jezusit, më pranë se askënd tjetër!

21/7 E mërkurë XVI K.GJ.V. [IV]
Sh. Lorenci nga Brindizi, meshtar dhe mësues (†1619)
Jer 1,1.4-10; Ps 70; Mt 13,1-9
Unë jam me ty për të të mbrojtur Jer 1,8
Jeremia ka frikë të bëjë sa i kërkon Zoti. Vetë Hyji e siguron: "Unë jam me ty!". Kur Hyji na propozon të bëjmë diçka, jemi të sigurt që ai vetë është angazhuar që të qëndrojë pranë nesh dhe të realizojë ai vetë atë çka ne, në dobësinë tonë, nuk mundemi ta bëjmë.
Pa frikë le t'i bindemi Hyjit!

22/7 E enjte Sh. MARIA MAGDALENË [P]
Kk 3,1-4 (opp. 2Kor 5,14-17); Ps 62; Gjn 20,1.11-18
Pse po qan, moj fisnike? Gjn 20,15
Sh. Marisë Magdalenë iu desh t'i përgjigjej kësaj pyetjeje. Ajo qante sepse nuk gjente trupin e vdekur të Jezusit, që përkundrazi ishte përballë saj i gjallë.
A ke dhe ti arsye për të qarë? Hidhi sytë përreth: Jezusi është i gjallë, ai që është gëzimi yt. Shiko me kujdes: ai të jep shenjat e pranisë së tij!

23/7 E premte Sh.Brigita, rregulltare, Pajtore e Evropës († 1373) [P]
Jt 8,2-8 (opp. 1Tim 5,3-10); Ps 10; Lk 2,36-38 (opp. Mt 5,13-16)
Të shndrisë drita juaj para njerëzve Mt 5,16
Shën Brigita është një person tek e cila kjo fjalë e Jezusit është realizuar. Jeta e saj akoma sot është shembull, aq sa është shpallur nga Gjon Pali II pajtore e Evropës. Kur misioni i saj si bashkëshorte dhe nënë e tetë fëmijëve përfundoi, iu kushtua shtegtimeve dhe lutjeve dhe themelimit të një urdhri të ri murgjëror. Tani ajo lutet ende për ungjillizimin e Evropës.

24/7 E shtunë XVI K.GJ.V. [IV]
Sh. Sharbel Makhluf, meshtar (†1898)
Jer 7,1-11; Ps 83; Mt 13,24-30
Dëgjojeni fjalën e Zotit Jer 7,2
Profeti Jeremia ndërhyn: populli do të shpëtohet nëse do të dëgjojë fjalën e Hyjit, edhe kur ai tërheq vëmendjen dhe qorton.
Ne nuk i bindemi asnjëherë tërësisht Atit, gjithnjë ruajmë disa hapësira për egoizmin tonë, dhe në këtë mënyrë vuajtja është gjithnjë e pranishme përreth nesh. Bën mirë Zoti që na qorton dhe na tërheq vëmendjen.

25/7 E diel XVII K.GJ.V. Viti C [I]
Sh. JAKOBI, apostull
Zan 18,20-21.23-32; Ps 137; Kol 2,12-14; Lk 11,1-13
Lypni e do t'ju jepet Lk 11,9
Çfarë do të kërkojmë? Kur i kërkoj diçka Hyjit duhet të jem i kujdesshëm që të mos kërkoj gjëra të vogla e kalimtare, gjëra që kënaqin vetëm për një çast!
Atij i kërkoj gjëra të mëdha, të denja për madhështinë e tij! Do i kërkoj besimin që zhvendos malet, do i kërkoj dashurinë që rrit vëllezërit e mi, do i kërkoj të jem vërtet bir i tij si Jezusi!

26/7 E hënë XVII K.GJ.V. [I]
Sh. Joakimi dhe Sh. Ana, prindërit e shën Marisë Virgjër
Jer 13,1-11; Lp 32,18-21; Mt 13,31-35
Do të flas në shëmbëlltyra Mt 13,35
Jezusi do t'u komunikojë të gjithëve diçka nga dituria e vet, të gjithëve atyre që e dëgjojnë me përvujtëri. Ai flet me shëmbëlltyra dhe këto kanë të mirën që ndihmojnë reflektimin. Shembëlltyra të ndihmon të përsiasësh mbi situatën tënde, të lexosh ngjarjet e jetës sate në dritën e një diturie të re. Kush dëgjon me përvujtëri një shëmbëlltyrë e lidh me faktet që i ndodhin, dhe në këtë mënyrë Hyji flet vazhdimisht

27/7 E martë XVII K.GJ.V. [I]
Sh. Natalia
Jer 14,17-22; Ps 78; Mt 13,36-43
Je ti, o Zot, ai në të cilin shpresojmë Jer 14,22
Tek kush mund të shpresojmë nëse jo vetëm në ty, o Zoti ynë? Jeremia ka jetuar përvojën që nuk mund t'u besojë njerëzve: ata janë të gjithë mëkatarë.
As tek vetja nuk mund të kemi besim, sepse jemi mëkatarë më shumë se të tjerët. Ti, o Zot, arrin deri aty sa urdhëron retë të dërgojnë shiun, për këtë unë kam besim tek ti dhe e lë veten në duart e tua!

28/7 E mërkurë XVII K.GJ.V. [I]
Sh. Sansoni
Jer 15,10.16-21; Ps 58; Mt 13,44-46
Shet gjithçka ka dhe e blen atë arë Mt 13,44
Ajo arë nuk ka ndonjë vlerë të veçantë. Atëherë përse ky njeri e ka kaq shumë për zemër? Sepse aty ka zbuluar një thesar.
Kur unë zbuloj praninë e Jezusit në familjen time apo në bashkësinë time nuk e braktis më familjen as bashkësinë. Aty unë mund ta ndjek Jezusin duke mbajtur kryqin e tij, aty unë marr jetën e pasosur!

29/7 E enjte Sh. MARTA [P]
Fu 31,10-13.19-20.30-31; Ps 14; Lk 10,38-42 (opp. Gjn 11,19-27)
Martë, Martë, ti po brengosesh dhe po shqetësohesh për shumë gjëra Lk 10,41
Ne ndjejmë simpati për Martën, sepse shpesh edhe ne trazohemi dhe shqetësohemi. Për këtë duhet të dëgjojmë me vëmendje fjalët që Jezusi i drejton asaj. Ka gjithnjë diçka më të rëndësishme nga gjërat e rëndësishme dhe është paqja e zemrës, ajo paqe e qetë që mund të përhapim rreth nesh kur duam Jezusin. Një mjedis në paqe të kënaq më shumë se një drekë e mirë!

30/7 E premte XVII K.GJ.V. [I]
Sh. Pjetër Krizologu, ipeshkëv dhe mësues († 451)
Jer 26,1-9; Ps 68; Mt 13,54-58
Nga i erdhi këtij kjo dije dhe kjo fuqi mrekullish? Mt 13,54
Jezus, ti ke fjalë që depërtojnë në zemër dhe në jetë, sepse flet gjithnjë duke shfaqur dashurinë e madhe të Atit, që ti e dëgjon në heshtjen e natës apo në vende të veçuara. Dua të të dëgjoj, dua ta mbaj në zemër fjalën tënde: ajo më bën edhe mua të ditur, edhe pse nuk kam frekuentuar shkollat e njerëzve!

31/7 E shtunë XVII K.GJ.V. [I]
Sh. Injaci i Lojolës, meshtar (†1556)
Jer 26,11-16.24; Ps 68; Mt 14,1-12
Nuk guxon ta mbash! Mt 14,4
Herodi mendonte se ishte i lirë të bënte ç'të donte në jetën e vet private. Por jeta private nuk është asnjëherë krejtësisht private. Sjella jonë ndikon gjithnjë tek të tjerët, në mënyrë pozitive ose negative. Për këtë në të gjitha zgjedhjet tona shkëlqen gjykimi i Hyjit: është më mirë për ne po të njohim në fillim vullnetin e Atit dhe vetëm më pas të marrim vendimet tona. Po t'i bindemi Hyjit është gjithnjë gjëja më e mirë, si për ne vetë ashtu edhe për të mos lënduar të tjerët.

BACK UP